ഹൈസ്കൂൾ – പ്രവർത്തനം 1 – ഇനിയും മരിക്കാത്തവരോട്

പ്രവർത്തനം 1 – ഇനിയും മരിക്കാത്തവരോട്

കലഹവും ഏറ്റുമുട്ടലുമെല്ലാം ജീവലോകത്ത് സ്വാഭാവികമാണ്. ഇരതേടുന്നതിന്റെയും ഇണ തേടുന്നതിന്റെയും ഭാഗമായി കലഹങ്ങളും ഏറ്റുമുട്ടലുകളും ജീവ ലോകത്ത് ഉണ്ടാവാറുണ്ട്. മാനവ സമൂഹത്തിന്റെ വളർച്ചയുടേയും വികാസത്തിന്റെയും ചരിത്രത്തിൽ മറ്റു പലതിനോടുമൊപ്പം യുദ്ധത്തിന്റെ ചരിത്രവുമുണ്ട്. പ്രകൃതിക്ക് മേലുള്ള അധിനിവേശത്തിന്റെ ഭാഗമായാണ് യുദ്ധങ്ങൾ പലതുമുണ്ടായത്. അതു കൊണ്ട് തന്നെയാണ് ഇനിയൊരു ലോക യുദ്ധം ഉണ്ടാവുകയാണെങ്കിൽ അത് ശുദ്ധജലത്തിന് വേണ്ടിയുള്ളതാകും എന്ന് പറയുന്നത്.
യുദ്ധത്തിന് അധികാരവുമായി പ്രത്യക്ഷ ബന്ധമുണ്ട്. ഭൂമിയിലെ സകല ജീവജാലങ്ങൾക്കും ഇനി ജനിക്കാനിരിക്കുന്നവർക്കും അവകാശപ്പെട്ടതാണ് പ്രകൃതി എന്നുള്ള മനോഭാവം എല്ലാവരിലും ഉണ്ടായാൽ മാത്രമേ പ്രകൃതി ചൂഷണത്തിനും അധികാരത്തിനും പദവിക്കും വേണ്ടിയുള്ള മനുഷ്യന്റെ ആർത്തി അവസാനിക്കൂ. യുദ്ധം സൃഷ്ടിക്കുന്ന കെടുതികൾ വിവരണാതീതമാണ്. യുദ്ധക്കെടുതിക്ക് ഇരയാവുന്നതിലധികവും പാവപ്പെട്ടവരാണ്. കുഞ്ഞുങ്ങളും സ്ത്രീകളുമാണ്. യുദ്ധരംഗത്തു നിന്നുള്ള ചിത്രങ്ങൾ പലതും നിങ്ങളുടെ മനസ്സിലുണ്ടാകും.

2019മെയ് മാസത്തെ ശാസ്ത്രകേരളത്തിന്റെ പത്തൊമ്പതാം പേജിൽ ഒന്നാം ലോകമഹായുദ്ധത്തിന്റെ യുദ്ധമുഖത്തു നിന്നുള്ള ഒരു ചിത്രമുണ്ട്. ആ ചിത്രം നിങ്ങളോട് ചിലതൊക്കെ പറയുന്നില്ലേ. ഇനിയൊരു ലോക യുദ്ധം ഉണ്ടായാൽ ആരൊക്കെ ബാക്കിയാവും? അങ്ങനെ ബാക്കിയായവരോട് നിങ്ങൾക്കും ചിലത് പറയാനുണ്ടാവും.അവരോട് പറയാനുള്ള കാര്യങ്ങൾ ഒന്ന് പങ്കുവെക്കൂ. കത്ത്, വിവരണം, ചിത്രം, കാർട്ടൂൺ ,കവിത, കഥ തുടങ്ങി നിങ്ങൾക്കിഷ്ടപ്പെട്ട ഏത് വ്യവഹാര രൂപവും സ്വീകരിക്കാം. കൂടുതൽ വിവരങ്ങൾക്ക് ശാസ്ത്ര കേരളത്തിലെ ലേഖനങ്ങൾ നിങ്ങളെ സഹായിക്കും. കൂട്ടുകാർ, രക്ഷിതാക്കൾ തുടങ്ങിയവരുടെ സഹായവും തേടാം. പ്രവർത്തനം ചെയ്തു കഴിഞ്ഞാൽ അത് മറ്റുള്ളവരെ കാണിയ്ക്കണേ.അവരുടെ അഭിപ്രായം ആരായൂ… ഈ വിഷയവുമായി ബന്ധപ്പെട്ട ആശയങ്ങൾ സ്വാംശീകരിക്കാനായോ? സ്വാംശീകരിച്ച ആശയങ്ങൾ മറ്റുള്ളവരുമായി പങ്കുവെക്കാൻ നിങ്ങൾ സ്വീകരിച്ച വ്യവഹാര രൂപത്തിന് കഴിഞ്ഞിട്ടുണ്ടോ? നന്നായി അവതരിപ്പിക്കാനായോ? എന്നിങ്ങനെ ഒരു പരിശോധനകൂടിയാവാം.