യു.പി.- പ്രവര്‍ത്തനം 10 – കളി കളിക്കാം

പ്രവര്‍ത്തനം 10 – കളി കളിക്കാം

നമുക്കൊരു കളി കളിച്ചാലോ? ഫോണിലൂടെ ആണേ കളി. നിങ്ങളുടെ മുന്നിൽ ഒരു കടലാസിൽ 1, 2, 3, 4, 5, 6, 7, 8 എന്നീ അക്കങ്ങളിൽ ഏതെങ്കിലും നാലെണ്ണം ഉപയോഗിച്ച് ഒരു നാലക്കമുള്ള സംഖ്യ എഴുതി വക്കുക. ഉദാഹരണത്തിനു് 3241 എന്നാ എഴുതിയത് എന്ന് കരുതുക. ഇനി നിങ്ങളുടെ ഒരു ചങ്ങാതിയെ ഫോണിൽ വിളിക്കുക. ചങ്ങാതിയോട് പറയുക ഞാൻ 1, 2, 3, 4, 5, 6, 7, 8 എന്നീ അക്കങ്ങളിൽ നാലെണ്ണം ഉപയോഗിച്ച് ഒരു നാലക്ക സംഖ്യ എഴുതി വച്ചിട്ടുണ്ട്. അതിൽ ഒരക്കവും ഒന്നിലേറെ തവണ ആവർത്തിക്കുന്നില്ല. സംഖ്യ ഏതാണെന്ന് ഊഹിക്കാമോ ? പത്ത് ചാൻസ് തരാം. ഓരോ പ്രാവശ്യം ഊഹം പറയുമ്പോഴും ഞാൻ ഉത്തരത്തിലേക്ക് എത്താൻ സഹായിക്കുന്ന രണ്ടു ക്ലൂ തരും. പറയുന്ന ഉത്തരങ്ങൾ ഒരു പേപ്പറിൽ കുറിച്ച് വക്കുകയും വേണം. ചങ്ങാതി ആദ്യ ഊഹം പറയുന്നു.

3817

ഈ ഊഹത്തിൽ 3 കൃത്യമായ സ്ഥാനത്താണു്. 8,7 ഇവ ഇല്ലാത്തവയാണ്. 1 ഉണ്ടെങ്കിലും സ്ഥാനത്തല്ല. അതിനാൽ നിങ്ങൾ കൊടുക്കേണ്ട ക്ലൂ ഇതാണ്. ” ഒരു ടിക് ഇടത് വശത്ത്, ഒരു ടിക് വലതു വശത്ത്” ചങ്ങാതിയോട് എഴുതി വച്ച ഊഹത്തിന്റെ ഇടത് വശത്ത് ഒരു ടിക്കും വലത് വശത്ത് ഒരു ടിക്കും ഇടാൻ പറയണം. “ഇടത് വശത്ത് ഒരു ടിക്” എന്ന് പറഞ്ഞാൽ അതിനർത്ഥം ഊഹത്തിലെ ഒരക്കം ശരിയും കൃത്യ സ്ഥാനത്തുമാണ്എന്നാണ്. “വലത്ത് വശത്ത് ഒരു ടിക്” എന്ന് പറഞ്ഞാൽ അതിനർത്ഥം ഊഹത്തിലെ ഒരക്കം ശരിയാണ് പക്ഷെ കൃത്യ സ്ഥാനത്തല്ല എന്നാണ്. പക്ഷെ ശരിയായ അക്കങ്ങൾ ഏതൊക്കെയാണ് എന്ന് പറയുന്നില്ല. ഇനി അടുത്ത ഊഹം പറയാം.

3867

ഇപ്പോൾ “ഇടത് വശത്ത് ഒരു ടിക് മാത്രം” ചങ്ങാതി ഊഹം എഴുതിയതിന്റെ ഇടതു വശത്ത് ഒരു ടിക് ഇട്ടു വക്കട്ടെ. അടുത്ത ഊഹം പറഞ്ഞോളൂ.

3812

ഇപ്പോൾ “ഇടതു വശത്ത് ഒരു ടിക്, വലത് വശത്ത് രണ്ട് ടിക്” ഇതിന്റെ അർത്ഥം മനസ്സിലായല്ലോ. നിങ്ങൾ എഴുതി വച്ച സംഖ്യയിലുള്ള മൂന്ന് അക്കങ്ങൾ ചങ്ങാതിയുടെ ഇപ്പോഴത്തെ ഊഹത്തില്‍ ഉണ്ട്. അതിൽ ഒന്ന് ശരിയായ സ്ഥാനത്തും രണ്ടെണ്ണം സ്ഥാനം തെറ്റിയും ആണ്. ഇനി 6578 എന്നാണ് ചങ്ങാതി ഊഹം പറഞ്ഞതെങ്കില്‍ ഇടതു വശത്തും വലതു വശത്തും ഒരു ടിക്കുമില്ല എന്നും ക്ലൂ കൊടുക്കണം. ചങ്ങാതി എഴുതി വച്ച ഊഹങ്ങളും അതിന് കിട്ടിയ ടിക്കുകളും നോക്കി വേണം അടുത്ത ഊഹത്തിലേക്ക് എത്താൻ. ഇങ്ങനെ കളി തുടരാം. ചങ്ങാതി ശരിയുത്തരം പറയുകയോ 10 ചാൻസ് ആകുകയോ ചെയ്താൽ കളി നിർത്താം. ഇനി മടക്കക്കളി. അതായത് ചങ്ങാതി സംഖ്യ എഴുതി വക്കട്ടെ. നിങ്ങൾ ഊഹം പറയുക. എന്താ ഒന്ന് കളിച്ചു നോക്കി കൂടേ? ആദ്യം ഒരു ട്രയൽ നടത്താം. പിന്നെ ശരിക്കും ഉള്ള കളിയാകാം.

ഊഹങ്ങളും അവയ്ക്ക് കിട്ടിയ ടിക്കുകളും വിശകലനം ചെയ്ത് അടുത്ത ഊഹത്തിലേക്ക് എത്താനും നിർദ്ദേശങ്ങൾക്കനുസരിച്ച് രസകരമായി കളിക്കാനും കഴിഞ്ഞോ എന്നും എത്ര പ്രാവശ്യം 10 ചാൻസിനുള്ളിൽ ശരിയുത്തരത്തിലേക്ക് എത്താൻ കഴിഞ്ഞു എന്നതുമാണ് നിങ്ങൾ തന്നെ നടത്തേണ്ട വിലയിരുത്തൽ. ആദ്യം പറഞ്ഞ ഊഹങ്ങളും അതിന് കിട്ടിയ ടിക്കുകളും പരിഗണിച്ച് തന്നെയാണോ പിന്നത്തെ ഊഹങ്ങള്‍ പറഞ്ഞത് എന്നും വിലയിരുത്തണേ.