യു.പി. – പ്രവര്‍ത്തനം 9 – ദുരന്തങ്ങളെ മറികടക്കാനാകും

പ്രവര്‍ത്തനം 9 – ദുരന്തങ്ങളെ മറികടക്കാനാകും

ഇക്കഴിഞ്ഞ നവംബര്‍ 30 ന് ടിവിയില്‍ വന്ന ഒരു വാര്‍ത്തയാണിത്.

“ബെറൂവി ചുഴലിക്കാറ്റ് ശ്രീലങ്കൻ അതിർത്തിയിൽ രൂപം കൊണ്ടു കഴിഞ്ഞു. മൂന്നു ദിവസത്തിനകം കൊല്ലം തിരുവനന്തപുരം ജില്ലകളിലൂടെ കടന്ന് വരുന്ന കൊടുംങ്കാറ്റിന് 100 കി.മീ. വേഗത ഉണ്ടാകും. മുൻകരുതലായി തിരുവനന്തപുരം വിമാനത്താവളം അടയ്ക്കും. അഞ്ച് ജില്ലകളിൽ റെഡ് അലർട്ട് പ്രഖ്യാപിച്ചു. കൊടുങ്കാറ്റ് അതിതീവ്ര ന്യൂനമർദ്ദമായി മാറാനും സാധ്യത ഉണ്ട്. ശക്തമായ കാറ്റും മഴയും ഒന്നിച്ചു വരുന്ന സാഹചര്യത്തിൽ പേപ്പാറ, അരുവിക്കര, തെന്മല, മാട്ടുപ്പെട്ടി ഡാമുകളുടെ ഷട്ടറുകൾ തുറക്കും. കെ.എസ്.ഇ.ബി. കണ്‍ട്രോൾ റൂം 24 മണിക്കൂറും തുറന്നു പ്രവർത്തിക്കും. തീരദേശത്തു നിന്ന് ആയിരക്കണക്കിനു കുടുംബങ്ങളെ ഉടൻ മാറ്റി പാർപ്പിക്കും. ഓരോ കുടുംബവും അവർക്കാവശ്യമായ എമർജൻസി കിറ്റുകൾ തയ്യാറാക്കുന്ന കാര്യത്തില്‍ ജാഗ്രത പുലർത്തണം.”

ക്യാമ്പിലേക്ക് പോകാൻ ആദിക്കുട്ടനും കുടുംബവും തയ്യാറെടുത്തു കഴിഞ്ഞപ്പോഴാണ് എമർജൻസി കിറ്റുകൾ തയ്യാറാക്കണം എന്ന ടിവിയിലെ അറിയിപ്പ് ശ്രദ്ധിച്ചത്. ഉടന്‍ തന്നെ അവര്‍ കൂട്ടായി ചര്‍ച്ച ചെയ്ത് എമർജൻസി കിറ്റിലേക്ക് വേണ്ട വസ്തുക്കളെ കുറിച്ച് ധാരണയുണ്ടാക്കി. അവയെല്ലാം ശേഖരിച്ച് എമര്‍ജന്‍സി കിറ്റ് ഉണ്ടാക്കി. 

എന്തൊക്കെ സാധനങ്ങളായിരിക്കും അവർ കിറ്റിൽ ശേഖരിച്ചിട്ടുണ്ടാവുക? അവർ എമർജൻസി കിറ്റിലേക്ക് ശേഖരിച്ചിരിക്കാന്‍ സാധ്യതയുള്ള സാധനങ്ങളുടെ ഒരു ലിസ്റ്റ് തയ്യാറാക്കൂ. ഇത്തരം സാഹചര്യത്തിൽ അവ ഓരോന്നിന്റേയും ഉപയോഗം എന്തൊക്കെയാണെന്നും എഴുതൂ.

എമര്‍ജന്‍സി കിറ്റിലേക്ക് ആവശ്യമായ സാധനങ്ങളുടെ ലിസ്റ്റ് ഉണ്ടാക്കാനും ഇത്തരം ഒരു സാഹചര്യത്തില്‍ അവ ഓരോന്നിന്റേയും ഉപയോഗം എന്തൊക്കെയാണെന്ന് കുറിക്കാനും നിങ്ങള്‍ക്ക് കഴിഞ്ഞോ എന്ന് നിങ്ങള്‍ തന്നെ വിലയിരുത്തുക. കിറ്റിന്റെ വലിപ്പം പരമാവധി കുറക്കാനും എന്നാല്‍ അത്യാവശ്യമുള്ളതൊന്നും വിട്ടുപോകാതിരിക്കാനും അനാവശ്യമായതൊന്നും ഉള്‍പ്പെടുത്താതിരിക്കാനും ശ്രദ്ധിച്ചിട്ടുണ്ടോ എന്നും വിലയിരുത്തണേ.