എൽ.പി – പ്രവർത്തനം 1 – പട പട പപ്പടം

പ്രവർത്തനം 1 – പട പട പപ്പടം

2020 ഏപ്രിൽ ഒന്നാം ലക്കം യുറീക്കയിൽ പ്രസിദ്ധീകരിച്ച അമ്മുവിന്റെ ഡയറിക്കുറിപ്പുകൾ വായിച്ചിരുന്നോ? എന്താണ് അമ്മു ഡയറിയിൽ എഴുതിയത്?

കാച്ചിയ പപ്പടം പൊട്ടിക്കുമ്പോഴാണോ ചുട്ട പപ്പടം പൊട്ടിക്കുമ്പഴാണോ കൂടുതൽ ഒച്ച എന്ന് അമ്മമ്മ ചോദിച്ചു. അമ്മു എല്ലാരോടും ചോദിച്ചു. അമ്മയോടും അച്ഛനോടും ചേച്ചിയോടും കൂട്ടുകാരോടും എല്ലാം. അവസാനം ടീച്ചറോടും ചോദിച്ചു. ടീച്ചർ പറഞ്ഞു. ” അതിനെന്താ, നമുക്കെല്ലാർക്കും കൂടി കണ്ടെത്താല്ലോന്ന്. എല്ലാരോടും ചെയ്ത് നോക്കാനും പറഞ്ഞു. അമ്മു വീട്ടിലെത്തി. നോക്കുമ്പോൾ ഒറ്റ പപ്പടം ല്ല. നാളെയാവാംന്ന് തീരുമാനിച്ചു. അമ്മു ചെയ്ത് നോക്യോ? ഇല്ലേ? എന്നൊന്നും നമുക്കറിയില്ല. എന്നാൽ നമുക്കൊന്ന് നോക്കാം. വീട്ടിലെ മുതിര്‍ന്നവരോട് സഹായം തേടാം. ല്ലേ. രണ്ട് പപ്പടം എടുത്തോളൂ. ഒന്ന് കാച്ചണം (എണ്ണയിൽ വറക്കണം,പൊരിക്കണം) മറ്റേത് ചുടണം. കൈ പൊള്ളിക്കരുതേ. അപ്പോൾ പരീക്ഷണം തുടങ്ങാം. പരീക്ഷണമാവുമ്പോൾ ഒറ്റത്തവണ കൊണ്ട് നിർത്താനാവില്ല. ഒരു ആറ് പപ്പടമെങ്കിലും സംഘടിപ്പിക്കണം. 3 എണ്ണം എണ്ണയിൽ പൊരിക്കാം. മറ്റേ മൂന്നെണ്ണം ചൂടാം. എന്നിട്ട് ഓരോന്നെടുത്ത് പൊട്ടിച്ച് നോക്കിയാലോ? ശരി പൊട്ടിക്കാം. ഏത് പപ്പടത്തിനാ ഒച്ച കൂടുതൽ? അത് കുറിച്ച് വക്കണേ.

ഇനി കാച്ചിയ പപ്പടത്തിനേം ചുട്ട പപ്പടത്തിനേം ഒന്ന് നന്നായി നിരീക്ഷിക്കൂ. എന്തൊക്കെ പ്രത്യേകതകളാ രണ്ടു പേർക്കും? എന്നാ ഇനി ആരാ കേമൻ? അവരൊന്ന് പറഞ്ഞ് നോക്കട്ടെ. അവരുടെ പ്രത്യേകതകൾ ചുട്ട പപ്പടവും കാച്ചിയ പപ്പടവും തമ്മിൽ നടത്തിയ സംഭാഷണമായി ഒന്നെഴുതി നോക്കൂ. ശരി ഇനി വീട്ടിലുള്ളവരെ വായിച്ചു് കേൾപ്പിക്കാം. എല്ലാവർക്കും ഇഷ്ടപ്പെടും തീർച്ച.

കാച്ചിയ പപ്പടത്തിനാണോ ചുട്ട പപ്പടത്തിനാണോ കൂടുതൽ ഒച്ച എന്ന് കണ്ടെത്താന്‍ കഴിഞ്ഞോ? ചുട്ട പപ്പടവും കാച്ചിയ പപ്പടവും തമ്മിലുള്ള സംഭാഷണം രസകരമായും കൃത്യമായും എഴുതാന്‍ കഴിഞ്ഞോ? ഇതൊക്കെ നിങ്ങള്‍ തന്നെ വിലയിരുത്തുക.